الدرس الخامس

الدرس الخامس ...

5) كيفية عمل تولبار بأسم موقعك في اليكسا وتقديمه الي زوارك


زي ما اتفقنا احبائي في الدرس اللي فات اهمية التولبار ده .. وازاي انه ممكن يفرق في ترتيب موقعك بشكل ملحوظ عشان كده احنا هنخلي اعضاء موقعك يحملوا التولبار ده وبأسم موقعك ( الشعار )



- ازاي ازاي ؟؟



انت علي طول مستعجل كده



الاول الشكل النهائي للتولبار علي الاكسبلور هيبقي كده ( من غير شعار موقعك )








اما علي الفايرفوكس فاتولبار بيبقي تحت ومبيظهرش فيه الصورة اللي مكتوب عليها اسم موقعك او منتداك ( شعار الموقع )










- اشمعني يعني ؟؟



والله نفسي اعرف اهو بقي تفرقة عنصرية

ودي صورة توضح مكان اللوجو بتاع موقعك








نبدا علي بركه الله ..




اولا يجب ان يكون لدينا حساب في شركة امازون الشهيرة وهي طريقة بسيطة ان شاء الله



- وايه اللي ودانا امازون دلوقتي ؟؟



ما احنا قلنا اليكسا شركة تابعة لأمازون ولازم يبقي عندك فيها اكونت عشان تعمل التولبار بتاعك



اولا ادخل علي هذا الرابط :

اضغـــــط هـــــــــنا


وبعد ما دخلنا نختار

No i am a new customer


وتكتب ايميلك في الخانة اللي قصاده











هتلاقي صفحة تسجيل .. سهل جدا ..




















وهوصل للصفحة اللي احنا فيها دلوقتي .. مكتوب فيها اليوزر نيم بتاعك كده








خد اليوزرنيم كوبي عندك في تكست لانك هتحتاجة كمان شوية

ويعدين نضغط علي

specify payment method later

وللتأكيد هذا هو اليوزر نيم تاني










بعد ما خدنا اليوزر بتاعنا كوبي .. نقفل بقي الصفحة مشتكرين



- خلص كده التسجيل ؟؟



اه خلص بتاع امازون بس ... نبتدي بقي نعمل التولبار ..



ندخل هلي الرابط ده

أضغط هـــنا



اولا صورة الشعار اللي هتعملها هتبقي صورة لا يتعدي حجمها 3 كيلو و طولها 21 وعرضها 70 .. يعني حاجة زغننه جدا .. فيعني لو مش عايز تعمل الشعار ده مفيش مشكلة دوس علي الرابط ده وهيوديك علي الصفحة اللي بعديها :







اما لو عايز تعمل الشعار عادي .. هتلاقي قدامك مستطيلين كده ادام كلمة

standard gif


و

transparent gif


شوف الخلفية اللي عاجباك فيهم ( بالنسبالي اختار الاولي ) وتعالا عندها وبعدين اضغط لمين كليك ودوس save picture as

واعملها save عادي عندك علي الجهاز



ودول الخلفيتين اللي هنعمل عليهم الشعار ..يعني الراجل بيسهل عليك عشان متتعبش في المقاسات








دلوقتي هنركن الصفحة دي شوية علي جنب .. ونبتدي نعدل علي الصورة الضخمة اللي حملناها



- هعدل عليها ازاي دي ؟



عادي باي برنامج للصور .. الافضل طبعا الفوتوشوب



- معنديش انا الفيتشويب ده اعمل ايه ؟؟



اولا اسمه فوتوشوب .. يعني لو متعرفوش يبقي انت ولا مؤاخذة متعرفش حاجة اسمها جرافيكس



- خلص يا عم ..!



ثانيا عادي اعملها بالـ paint زي مانا عملتها بس مش هتطلع طبعا بحلاوة الفوتوشوب ...
بصوا دي الصورة اللي انا عملتها بال paint .. بسم الله ما شاء الله يعني روعة روعة ( اللهم ما حسد )







خبرة انا في التصميم
( وممكن كمان تعلمها صورة متحركة بالايمج ريدي مثلا بس لازم مساحتها متزدتش عن الـ 3 كليو )



- طيب دلوقتي هنتصرف ازاي في الصورة دي ؟؟



الاول نغيير اسم الملف لـ toolbar.gif
وبعد كده عادي خالص هنرفعها بالاف تي بي



- تاني ؟؟



وتالت كمان .. لازم بقي تحبوا

طبعا هنرفعها عادي زي ما شرحت في الدروس اللي فاتت.. هنفتح الاف تي بي ونكتب اسم الموقع واليوزر والباص وبعدين نرفع الصورة لاي فولدر تحبه .. انا عن نفسي رفعته في فولدر الصور Images واقدر اشوف الصورة من الرابط ده

www.xxxx.com/images/toolbar.gif



رابط الصورة حطة في ملف تكست برضه مع اليوزر نيم بتاع امازون .. هنرجعلهم اهو حالا



نرجع بقي للصفحة اللي سايبنها علي النار .. قصدي علي المتصفح والمرادي هنضغط continue









هتظهرلك دلوقتي صفحة فيها مربع فيه كلام ولت وعجن كتير







- اه ايه العجينة دي ؟؟ انا مش فاهم حاجة !!



لا عجينة ولا حاجة .. سهلة جدا ركز بس في الكود اللي مكتوب .. مطلوب منك تعدل علي 4 حاجات



- ايه هم ؟؟


الاول هتعدل علي الكلام اللي بين كلمتي وهنكتب بدل الكلام ( your associate - id ) اسم اليوزر نيم بتاعنا بتاع امازون واللي عملناله save في مف تكست

التاني هنعدل بين كلمتي وهنكتب بدل الكلام (your company name here ) هتكتب اسم موقعك او اسم شركتك

التالت هنعدل الللي بين كلمتي وهنكتب بدل ( your site adress ) رابط موقعك و يفضل يكون كده http://www.xxxx.com

رابعا حاجة والاخيرة هنعدل علي الكلام اللي بين <> وهنكتب بدل الكلام ( http://www.mycompany.com/images/toolbar.gif ) هنكتب رابط الصورة اللي عمناها واللي قولتلك احفظ الرابط بتاعها في ملف التكست مع اليوزرنيم


- مش واضحة اوي الفكرة .. انت لغبطني !!!



عادي الصورة اللي جاية فيها وصف للكام سطر اللي فاتوا دول









ياريت تكون الفكرة وصلت وده تطبيقي انا بعد ما عدلت علي الكود









تمام كده ؟؟



-اه تمام وعملت الكود مظبوط ان شاء الله



طيب جميل .. دلوقتي اركن صفحة المتصفح علي جنب دلوقتي ومتقفلهاش .. بعد كده خد الكود كله كوبي بعد ما عدلنا عليه .. واعمل ملف تكست جديد وحط فيه الكود








اعمله save وبعدين عدل علي اسمه وامتدادة
بدل new text Document.txt
هنخليها toolbar.xml

وهيبقي في النهاية شكلة عامل كده







ملاحظة : اللي ما يظهر عنده امتداد الملف .. يفتح My Computer .. ثم من شريط الادوات فوق يختار tools > Folder option
ثم بعد كده









وللمرة الاخيرة ان شاء لله في الدرس ده هنرفع ملف بالاف تي بي ... وهيكون التولبار اللي عاملناه .. اظن اتشرح قبل كده .. سهلة ومفهاش اي مشاكلة .. وهنرفعها في المجلد الرئيسي بيحث نقدر نفتحه من الرابط ده

www.xxxx.com/toolbar.xml
يعني هنرفعه جنب ملف Index.html وكده

ولو فتحناه من المتصفح الفروض تطلع الصفحة كده









... بعد ما رفعناه نرجع تاني لصفحة المتصفح اللي ركناها .. وهنلاقي مستطيل عريض شوية تحت المربع اللي فيه الكود اللي عدلنا عليه والمستطيل بأسم import your configuration









وده هنكتب فيه رابط التولبار وفي حالتنا لو انت رافع زيي او زي ما اتفقنا اننا هنرفعه في الرئيسية يبقي هنكتب الرابط كده

www.xxxx.com/toolbar.xml

وبعدين ندوس علي continue




واخيرا والحمد لله وصلنا للصفحة تقريبا النهائية هتلاقي فيها اسم موقعك و الرابط و اليوزر نيم بتاع امازون والصورة اللي عملتها .. وهتلاقي كمان صورة مصغرة للتولبار بعد ما اتحط فيه الصورة اللي صممتها .. وفي اخر الصفحة هتلاقي رابط جنب ( your download link ) وهو ده الرابط اللي هتديه لاعضاءك يحملو منه التولبار








طبعا ناخد الرابط ده عندنا في ملف تكست عشان نستخدمة بعد كده

ولو فتحنا الرابط من اكسبلور هنلاقي حاططلنا شكل التولبار بالتصميم و زرار install now عشان نحمل منه التولبار











ولو فتحناه من الفايرفوكس .. هنلاقي برضه حاططلنا شكل للتولبار بس من غير التصميم .. وشريط اليكسا في الفايرفوكس بيظهر تحت مش فوق زي اكسبلور .. ونضغط علي Get Sparky عشان نحمله









اما عن طريقة بقي عرض التولبار للزوار واعضاء موقعك فده شيء سهل جدا .. الاول تعمل بانر ويستحسن يكون متحرك للتولبار ده .. وده لازم يبقي بالفوتوشوب والايمج ريدي عشان يطلع حلو واكتب في البانر مميزاته او ممكن تكتب ( اذا كنت تريد ان تدعم موقع xxx فحمل التولبار فهو يمنع الصفحات الدعائية ويمنع السبام و و و ) المميزات بتاعته يعني بطريقة متحركة جميلة

وذا كنت تستخدم موقع عادي .. فبالفرونت بيج تقدر تعمل حيز لصورة البانر وتحط رابط تحميل التولبار ( اللي حطناه في ملف تكست ) ولو كانت واجهه يبقي بالبرنامج اللي انت صممت بيه الواجهه تقدر تعمل مكان للبانر ( فوتوشوب مثلا )

اما لو منتدي فتقدر تركب الهاك اللي في المرفقات ..الهاك لاخونا ( سعيد العطوي ) الصراحة هاك روعة للاعلانات .. تقدر تعمل اعلان كبير وتحط فيه صورة البانر ورابط تحميل التولبار
وده موضوعه فيه شرح الهاك وكيفيه التركيب

http://traidnt.net/vb/showthread.php?t=907079


وبكده يبقي انتهي الدرس الخامس علي خير .. واللي الصراحة تعبت فيه اوي .. ياريت متنسوش التطبيقات ومتسنوش برضه استفسارتكم وأسئلتكم وانا في الخدمة ان شاء الله...

تحياتي لكم

الدرس الرابع

بسم الله الرحمن الرحيم

الدرس الرابع ...

4 ) نبذه عن عن نظام عمل اليكسا وكيف يحسب ترتيب المواقع



اليكسا شركة تأسست عام 1996 وهي تابعة لشركة Amazon المشهورة وهي تقوم بتقييم المواقع حسب عدد زوار الموقع .. بحيث من لدية زوار اعلي يكون في مرتبة اعلي عند اليكسا وترتيبة يصبح افضل و الترتيب بيكون من 1 الي الترتيب 20 مليون تقريبا .. و تبدأ انت في المنافسة الحقيقية عندما بصبح ترتيبك اقل من 100 الف .. فبالتأكيد عندها يأتيك زوار باعداد عالية و يتم تحديث اعداد الزوار لدي اليكسا لموقعك كل 3 شهور وهي متوسط النسبة بعد احتساب عدد الزوار و عدد الصفحات المشاهدة بشكل يومي



واليكسا تعتمد اساسيا علي في الترتيب علي من يستخدمون التولبار الخاص بها ( تولبار اليكسا ).. اي ان من يزور موقعك مركب لديه هذا التولبار افضل من لم يركبه .. وتكون الزيارات الاخري التي من زوار لا يمكلون هذا التولبار تقديرية الي حد ما ذلك يفسر لنا قوة بيج رانك بعض المواقع لكن بترتيب متأخر على اليكسا



لذلك تري كثيرا في المنتديات يدعوك لتحمل تولبار اليكسا ويقعد يديك في مميزاته عشان تنزله .. فصاحب الموقع المستفيد الاول من استخدامة فبلا شك اذا كثر عدد اعضاءه المستخدمين لهذا التولبار فهو يضمن له التقدم في المرتبه لدي اليكسا



ولكن سباق اليكسا يساعد المعلنين واصحاب المواقع لمشاهدة قيمة و مكانة المواقع بين بعضها البعض

والان هناك اتفاقيات جارية بين اليكسا وجووجل لم تنتهي بعد ليتم ربط ترتيب اليكسا بالبيج رانك الخاص بجووجل بحيث يصبح ترتيب اليكسا اعلي دقة واحتساب الزوار كلهم بما فيهم من ليس لديه تولبار اليكسا



اذن يصبح استخدام تولبار اليكسا هو العامل الرئيسي و والاول في الحصول علي ترتيب افضل لدي اليكسا
ولذلك باذن الله سوف اقوم في الدرس القادم بشرح كيفيه عمل تولبار باسم موقعك وتجعل اعضاءك يستعملوه



تقبلوا ارق تحياتي

الدرس الثالث

الدرس الثالث ...

3 ) انشاء ملف الروبتس ( Robots.txt ) فهو بوابة دخول جووجل اليك

الاول تعالا نتعرف علي عناكب البحث .. ما هي العناكب ؟؟

بمنهي البساطة .. كل محرك بحث ليه العناكب بتوعه .. وظيفته الدخول علي الموقع وفهرسته اي صفحة تزورها هذه العناكب

بمعني ان محرك بحث جووجل ليه عناكب غير بتاعت ياهو غير ام اس ان .. فكل واحد منهم بيدخل موقعك ويفهرسة لمحرك البحث الخاص به

عشان كده تعتبر العناكب دي حلقة الوصل بينك وبين محركات البحث .. ودي اللي بتزود ارشفة موقعك بالـتأكيد
وان شاء الله بعد تطبيق هذه الدورة في البداية ستجد ان موقعك يزوره عناكب بشكل قليل الي حد ما .. يعني مثلا انا في اول شهر كان بيجيلي واحد بس من العناكب دي .. بس اخر الشهر ده وصلوا لاتنين .. وكل شوية بيزيدوا مع الوقت ... وبعد شهر ونص بقيت الاقي عناكب جووجل بتوصل الي 10 بخلاف عناكب ياهو

طيب دلوقتي اكيد في دماخك سؤال مهم .. ازاي اجيب العناكب دي ؟؟ ووهل بتدخل علي كل ما هب ودب في الموقع ؟؟

سؤال طبعا ممتاز .. بالنسبة للجزء الاول من السؤال انك تجيب العناكب ازاي ده شيء سهل فقط طبق ما موجود في الدورة .. خاصة الدرس الاول والدرس الثانية وستجد اول عنكبوت لديك باذن الله .. ويزيدون بعد تطبيق باقي دروس الدورة ان شاء الله

اما الجزء الثاني من السؤال انه بيدخل علي كل ماهب ودب في الموقع فالأجابة هي نعم .. يدخل الي اي موضوع او صفحة بموقعك مهما كانت بعيدة

- طيب انا عندي صفحات حساسة و مهمة لا اريد ارشفتها فما العمل ؟؟

لهذا السؤال تم عمل شيء اسمه ملف الروبتس robots.txt

- ايه فايدة ملف الروبتس ده ؟؟

فائدته كبيرة جدا .. فهذا كالطريق الذي ترشد به العناكب الي موقعك .. وتمنعهم من رؤية وفهرسة صفحات ومواضيع تختارها انت .. ولذلك هذا الملف حل هذه المشكلة واصبحنا الان نتحكم فيما يظهر في نتائح البحث وفيما لا نريد ان يظهر

- طيب ايه خطوات عمل الملف ده ؟؟

هو ده اللي هنتعلمه في الدرس ده انك ازاي تعمل ملف الروبتس .. وايه اللي هنكتب جواه ... وفين هنعرفه

نبدأ بسم الله

اولا نبدا بعمل ملف نصي جديد ونسمية

رمز PHP:

robots.txt


بعد ما عملناه هنعرف دلوقتي ازاي تقدر تحجب مثلا فولدرات من الارشفة او الغاء صفحة محددة او الغاء محرك بحث جووجل من اي ارشفة لموقعك

ملاحظة :: يتم رفع ملف الروبتس في المجلد الرئيسي للموقع .. اي يمكننا فتحه عن طريق هذا الرابط
www.xxxx.com/robots.txt

اولا .. اذا كنا نريد ان نجعل كل محركات البحث تأرشف موقعنا كله فنكتب هذا الكود في ملف الروبتس اللي عمناه

رمز PHP:

User-agent: *


يبقي هذا الكود يجعل موقعك مفتوح علي مصرعية لاي محرك بحث

-طيب افرض نحن لا نريد ارشفة مثلا لوحة تحكم المنتدي اذا عندنا منتدي؟؟

يبقي هنكتب الكود هكذا :

رمز PHP:

User-agent: *
Disallow: /vb/admincp/


يبقي دلوقتي فهمنا ازاي نقدر نمنع جووجل من ارشفه اشياء معينة

.. طيب اذا كنت تريد الغاء ارشفة موقعك من محركات البحث نهائيا ؟؟

نكتب الكود هكذا :

رمز PHP:

User-agent: *
Disallow: /


وهنا نحن لم نحدد فولدر معين اي ان الموقع كله سيتم الغاء ارشفته

ويمكنك الغاء محرك بحث جووجل فقط عن طريقة هذا الكود :

رمز PHP:

User-agent: Googlebot
Disallow: /


اي ان Googlebot هو اسم جووجل الحركي ولكل محرك بحث اسم خاص به .. وتجد محرك البحث ياهو اسمه Yahoo slurp!

وهذا الكود ايضا لالغاء ومنع ارشفة الصور لديك اذا كانت موجودة بملف images
حيث انه الصور المتأرشفه تظهر في محرك بحث جووجل للصور كما نعرف .. اذا كنت تريد الغاء ارشفه الصور موجوده في فولدر معين هتبقي كده

رمز PHP:

User-agent: *
Disallow: /images/


وبالتبعية اذا دمجنا الاكودا واردنا كود يمنع محرك بحث جووجل فقط من الدخول علي فولدر الصور هيكون كده :

رمز PHP:

User-agent: Googlebot-Image
Disallow: /images/


ونقدر نمسح اسم فولدر ايمج من الكود اللي فات وبالتالي هنمنع جووجل من ارشفه اي صورة بالموقع
يبقي احنا نقدر نسوي ما نريد عن طريق ادخال الكل في بضعه


مثال : نريد ان نصنع ملف روبتس بحيث اننا نمتلك منتدي و لدينا ثلاث مجلدات باسم 1 و 2 و 3 حساسين ولا نريد ارشفتهما موجودين بفولدر اسمه مثلا vip .. اذن كيف تتوقع يكون الملف عامل ازاي ؟؟؟ ياريت تطبق قبل ما تشوف الطريقة
.
.
.
.
.

راح يكون هكذا :

رمز PHP:

User-agent: *
Disallow: /vb/admincp/
Disallow: /vb/includes/
Disallow: /vb/modcp/
Disallow: /vip/1
Disallow: /vip/2
Disallow: /vip/3


يبقي في النهاية .. هذا الكود :

رمز PHP:

User-agent: *


يفتح لك الارشفة لكل محركات البحث

وهذا الكود لمنع ارشفة الفولدرات الي تحددها :

رمز PHP:

User-agent: *


وافضل ملف روبتس يمكن اضافة لموقعك اذا كنت تمتلك منتدي هو هذا الكود القادم .. هتلاقيني مانع من فهرسة المجلدات والملفات غير المهمة والتي لا يوجد منها نفع اذا دخلتها العناكب حيث انها لا تأرشفها كما انها توفر الباندويدث لموقعك بشكل ملحوظ وتخفف اللود علي السيرفر ايضا

انصحك به بشدة ..
قم بوضع هذا الكود لملف الروبتس ( لاصحاب المنتديات كما قلنا )

رمز PHP:

User-agent: *
Disallow: /forums/admincp/
Disallow: /forums/clientscript/
Disallow: /forums/cpstyles/
Disallow: /forums/customavatars/
Disallow: /forums/customprofilepics/
Disallow: /forums/images/
Disallow: /forums/modcp/
Disallow: /forums/ajax.php
Disallow: /forums/attachment.php
Disallow: /forums/calendar.php
Disallow: /forums/cron.php
Disallow: /forums/editpost.php
Disallow: /forums/global.php
Disallow: /forums/image.php
Disallow: /forums/inlinemod.php
Disallow: /forums/joinrequests.php
Disallow: /forums/login.php
Disallow: /forums/member.php
Disallow: /forums/memberlist.php
Disallow: /forums/misc.php
Disallow: /forums/moderator.php
Disallow: /forums/newattachment.php
Disallow: /forums/newreply.php
Disallow: /forums/newthread.php
Disallow: /forums/online.php
Disallow: /forums/poll.php
Disallow: /forums/postings.php
Disallow: /forums/printthread.php
Disallow: /forums/private.php
Disallow: /forums/profile.php
Disallow: /forums/register.php
Disallow: /forums/report.php
Disallow: /forums/reputation.php
Disallow: /forums/search.php
Disallow: /forums/sendmessage.php
Disallow: /forums/showgroups.php
Disallow: /forums/subscription.php
Disallow: /forums/threadrate.php
Disallow: /forums/usercp.php
Disallow: /forums/usernote.php


طبعا اذا كان لديك مجلدات اخري خارج المنتدي تريد منعها من الفهرسة تضفها بعد الكود السابق كما تعلمنا

واذا ارشفت جووجل لاي صفحات لا تريد ارشفتها يمكنك الغاء ارشفتها بسهولة من هذا الرابط .. فهي هتلاقي كل اللي هتحتاجة في الحالات الحرجة اللي ذي دي
http://www.google.com/webmasters/remove.html

وهذه ايضا اداة مفيدة جدا وهي لعمل اختبار لملف الروبتس اللي عندك .. لو فيه اخطاء راح يقولك ويكتبلك سبب الخطأ اللي عندك وانت تحاول تعمل اللي بيقولك عليه اذا كان عندك اي اخطاء

http://tool.motoricerca.info/robots-checker.phtml

مع العلم في النهاية ان جووجل لا تأرشف اي ملفات مرفوعة الي موقعك .. يعني علي سبيل المثال لن تأرشف الباك اب الخاص بك .. لكن يفضل منع ارشفه الفولدرات التي تحتوي علي مثل هذه الملفات حتي ان كانت لن تتأرشف وذلك لتوفير الترافيك والباندويدث

وبكده نكون خلصنا الدرس الثالث علي خير .. يارب تكون استفادتم وطبعا زي كل مرة ياريت اللي عنده سؤال يسألني وانا في الخدمة ان شاء الله

الدرس الثانى

الدرس الثاني ..

2 ) عمل السايت ماب لموقعك

درس جميل وسهل ومهم جدا لارشفة موقعك و زيادة نتائج البحث لجووجل .. مش هخش المرادي في التفاصيل مش مهمة اوي .. المهم نطبق .. يلا معايا

- ايوة كده ياخي ده انت كنت قارفنا بكلامك ده

اولا ده موقع بيأرشف لك الموقع بس مشكلته ليه عدد اقصي للصفحات اللي ممكن يأرشفها وهو 500 صفحة .. يعني لو عندك موقع تاني او برنامج اخر يأرشف اكتر او عدد لا نهائي استخدمة بدل ده ول معرفتش قوللي وانا اعملك شرح ليه ان شاء الله وبعد كده تكمل بقية الشرح معانا عادي من اول ما نوصل لخطوة رفع ملف السايت ماب

يلا نتوكل علي الله

نخش علي الموقع ده :

www.xml-sitemap.com


وبعدين نكتب اسم الموقع بتاعك وندوس Start

وبعد كده هتظهرلك الصفحة دي وفيها بيأرشف الصفحات اللي عندك .. استني بقي كده دقايق علي حسب عدد صفحات موقعك

بعد ما يخلص الأرشفة بحمد الله هتطعلنا صفحة زي دي ومنها نحمل ملف السايت ماب من الرابط اللي في الصورة ده

واصبح لنا هذا الملف عندنا بعد فك ضغطه

دلوقتي هنرفع الملف ده علي الموقع بتاعنا عن طريق برنامج الاف تي بي
لو مش عندك البرنامج حمله من هنا

حمله من هـــــنـــــا

بعد ما اتحمل واتسطب ( لو قابلتك اي مشاكل في التسطيب قوللي واعملك الشرح ليه حالا ) هنفتح البرنامج عادي ونكتب حساب الاف تي بي بتاعنا

ممكن في الـ Address نكتب اسم الموقع عادي انا نفعت معايا مثال : 3arablink.com
وبعدين نكتب اسم اليوزر بتاع السي بانل والباس بتاع السي بانل برضه وبعد كده ندوس GO

(لاصحاب الاستضافات المجانية الحوار بيختلف جرب تخش باليوزر والباس بتاع لوحة تحكم الموقع سواء كانت بقي لوحة التحكم سي بانل او لوحة تحكم من المستضيف .. لو منفعش يبقي تخش علي لوحة التحكم و تعمل اكونت اف تي بي جديد بيوزر وباسوورد جداد )

دلوقتي الموقع فتح معانا بحمد الله .. مكونات الجهاز بتاعنا ناحية الشمال .. ومكونات الموقع بتاعنا ناحية الليمين

نجيب مكان ملف السايت ماب اللي حفظناه علي جهازنا من ناحية الليمين وندوس عليه ونرفعه للموقع بالضغط علي السهم المتجه نحو ناحية مكونات موقعك وخلي بالك يفضل طبعا انك ترفعه في المجلد الرئيسي للموقع .. يعني داخل فولدر public_html او فولدر www بحيث انك تقدر تفتحه من المتصفح بهذا الشكل

www.xxxx.com/sitemap.xml

وبكده نبقي رفعنا ملف السايت ماب بحمد الله

-ايه خلاص كده ؟؟

لا يا حبيبي لسه ... دلوقتي سيب الاف تي بي زي ما هو كده متقفلوش هنرجعله تاني

دلوقتي نخش علي الرابط ده

https://www.google.com/webmasters/sitemaps

ونكتب اسم موقعنا زي ما في الصورة كده وبعدين نظغط Add Site ( يجب ان يكون لديك حساب او ايميل علي جووجل حتي تستطيع عمل هذه الخطوة ان لم يكن لديك تقدر تعمل واحد من هنا اضغــــط هـــــنا ولو فيه اي مشاكل في عمل الاكونت ده بجد لا تتردد )

بعد ما كتبنا اسم الموقع هيطلعلنا صفحة عاملة كده .. ندوس علي Verify your site

بعد ما دوسنا هيودينا الصفحة دي .. وفيها هنختار Upload an HTML file في اول اختيار .. كده

نركز بقي يا معلمين ... دلوقتي جووجل عشان تضمن ان انت صاحب الموقع لازم تعمل حاجة تتأكد بيها

- ايه بقي الحاجة دي ؟؟

زي ما مكتوب في الصورة اللي فاتت .. تعالا بره علي الديسك توب كده مثلا واعمل ملف تكست جديد Create new text file وبعد كده نسمية ونغيير امتداده بالاسم اللي طلعولاك في الصفحة

- لأ وضحلي والنبي اكتر ..

دلوتقي هتلاقي في الصفحة اللي انت فيها مكتوب

اهو تحت الجملة دي هتلاقي اسم ملف طويل ورخم بامتداد HTML خده كوبي واعمل ملف تكست جديد وسميه بالاسم الجديد مع تغيير الامتداد زي ما قلنا وخلي بالك مش هيطلعلك نفس اسم الملف اللي موجود في الصورة اللي فاتت طبعا لكن كل واحد بيخش علي الصفحة دي هيلاقي رقم غير التاني Create the HTML verification file specified below and upload it

خلاص كده بقي عندنا ملف اللي جووجل طلبته مننا بنفس الاسم والامتداد اللي قالتهولنا .. ولازم شكل الايكونة بتاعته تتحول لملف انترنت وبالنسبالي انا هيبقي الملف في الاخر بالشكل ده

( اللي معرفش يعمل الخطوة دي او اللي معرفش يغيير الامتداد يقوللي وانا اشرحلة تانية واقوله ازاي تظهر الامتداد لاي ملف لو كان مخفي )

خلي بالك منقفلش صفحة المتصفح دي دلوقتي خالص هنرجعلها حالا

دلوقتي كده خلاص خلصنا عمل الملف هنرجع للاف تي بي نرفعه زي السايت ماب بالظبط و هيترفع جنب السايت ماب في نفس الفولدر وهو الفولدر الرئيسي

بحيث انك تقدر تفتحه من المتصفح كده

www.xxxx.com/google3371929fa3b7bd816.html

بمعني اصح هنرفعه برضه في فولدر public_html او فولدر www يعني المكان الرئيسي للموقع

بعد ما رفعنا الملف بحمد الله نرجع تاني للمتصفح و دوس علي Verify

بعد ما ضغطنا علي verify هنروح علي صفحة كده ومكتوب فيها اسم الموقع اللي انت ضيفته .. ادامه هتلاقي رابط Add تحت خانة الـ Site map اضغط عليه

بعد ما ضغطنا هنروح لصفحة هنختار في الاول Add general web sitemap

وبعد كده هنكتب في خانة رقم 3 اسم ملف السايت ماب اللي عملناه هتلاقيه هو كاتب موقعك تعالا عند الخانة اللي هتكتب فيها واكتب

بس
sitemap.xml

- اشمعني هنكتب كده ؟؟

نسيت مش احنا رفعناه علي فولدر الموقع الرئيسي

يعني في النهاية هتبقي شكلها كده وفي الاخر ندوس علي Add general web sitemap

بعد الضغط هتظهر الصورة دي

وبيقولك ان خلاص انت كده تمام واستني بقي يوم كده يكون اتعمله Verified يعني جووجل تكون وفقت عليه وتبتدي نتايج البحث تزيد ان شاء الله

الدرس الأول

نبدأ الدرس الاول علي مشيئة الله ...

1 ) اسرار تسجيل موقعك في جووجل في اقل من 24 ساعة

طبعا اول شئ تفكر فيه وانت بتصمم موقعك هو الزوار .. ازاي اقدر اجيب الزوار .. ممكن تبدي تفكر في الاعلانات المدفوعة .. ممكن ليه لأ

ممكن تبتدي تشهره لاصحابك وقرايبك ... ممكن طبعا

بس مش دول كل حاجة .. حوار الاعلانات المدفوعة رغم انه مكلف لكن نتايجة برضه مش قد كده .. بمعني ان الزوار اللي بيزوروا موقعك نصهم تقريبا زوار غير مستهدفين

ونفس الحكاية لما تنشرة بين اصحابك وقرايبك .. ناس كتير متعرفش من الاصل ايه المنتدي ده وناس تانية تري المنتدي مجرد لعبه وتالتين يعملوا مشاركات مجامة عشانك .. هتلاقي منهم شغل بس برضه مش المطلوب

- امال ايه بقي يا عم الحج قارفنا ليه بكلامك ده ..

بص يا باشا دلوقتي طبعا مين مبيخشش علي جووجل كل يوم ..
وكام عمليه بحث بتعملها ؟؟

فعليك ان تتأكد افضل زوارك هم من محركات الحث .. لانهم الزوار المستهدفين
يعني لما يجي العضو بنفسه يتعب نفسه ويعمل بحث في جووجل ويلاقي موقعك ويخش عليه و يلاقي الحاجة اللي بيدور عليها واللي عملها البحث .. اظنه افضل من احنا نرغمة علي الدخول بالبانرات والاعلانات الدعائية وغيره .. ده غير ان العضو ده هيجيلك تاني بعد ما لقي الحاجة اللي عايزها في الاول

فبالتالي هدفك الاول لتجميع الزوار هو محركات البحث .. خلاص اتفقنا ؟؟

- ياعم اتفقنا ده انت رغاي اوي خلصنا بقي

طيب طيب حيلك عليا هنخش اهو في الموضوع

اي واحد صاحب موقع جديد واقتنع بفكره محركات البحث هيبتدي او حاجة يفكر ازاي يحط موقعه علي جووجل ويتمني انه يتحط باسرع سرعة

- برضه هيقرفنا تاني برغيه ده

انا هقولك ازاي تحطه في اقل من 24 ساعة .. وانت و مجهودك برضه ..

قبل اي حاجة نصيحة مهمة جدا ..

لا تستخدم ابدا رابط اضافة موقعك في جووجل ابدا اللي هو :

www.google.com/addurl.html

طبعا واحد هيسألني ويقولي لييه ؟؟

- اه ليه والنبي يا اونكل

في مرة جربت احط موقعي من هذا الرابط .. لا تتصورا كم انتظرت حتي وجدت موقعي علي جووجل اول مرة .. ياه حوالي 3 او 4 شهور

- يا ساتر ايه ياعم ده

فعلا ده اللي حصل معايا وحصل مع كل الناس وممكن توصل المدة كمان لستة اشهر

- طيب ايه الحل بقي ؟

الحل بسيط جدا .. هل سمعت ولو نبذة بسيطة عن جووجل بيج رانك ؟؟

- اه يعني .. بس ليه ؟؟

بص يا معلم دلوقتي سر وضع موقعك في اقل من 24 ساعة علي جووجل وغيره من محركات البحث الاخري في البيج رانك هذا .. فوضعك لرابط او وصلة لموقعك في اي موقع ذو بيج رانك اعلي من 5 او حتي 4 يجعل موقعك موجود في جووجل في اقل من 24 ساعة قد تزيد قليلا ..

- حيلك حيلك انا مش فاهم منك اي حاجة ..

الحوار بسيط جدا .. الاول نحمل التولبار بتاع جووجل اللي نقدر نعرف بيه البيج رانك لاي موقع

http://toolbar.google.com

وخلي بالك اهم حاجة هيظهرلك صفحة الـ setup للتولبار بعد التحميل وهيكون في خيار اسمه تمكين الـ page rank لازم تضع امامه علامه عشان نقدر نحدد اي بيج رانك لاي موقع

وبعد التحميل التولبار بتاع جووجل هيبقي بالشكل ده

- جميل نزلت التولبار بس انا مجرد بسمع عن البيج رانك ده يعني ايه هو اصلا ؟؟

بص مش لازم تفهم معناه دلوقتي ادام هعرفك كل حاجة بالظبط ان شاء الله .. المهم دلوقتي انك بس تعرف تحدد البيج رانك بتاع اي موقع .. وده سهل خالص

مثلا نفتح موقع زي الفيس بوك

www.facebook.com

ولما نفتح الموقع بص الصورة اللي جاية كده

زي ما شفت البيج رانك الخاص بالفيس بوك هو = 9

يعني البيج رانك موجودة في الحته الخضرا اللي عند الشريط وبمجرد انك تجيب عليها الماوس يعرفك الموقع ده بيج رانك كام ..

( ملاحظة : للحصول علي بيج رانك 9 اشبه بالخيال .. انا مش بهبط من معنوياتك لكن صعب جدا الحصول علي هذا البيج رانك .. )

ملاحظة اخري : هناك طريقة اسهل لمعرفة بيج رانك اي موقع عن طريق الدخول لهذا الموقع

http://www.prchecker.info/check_page_rank.php

وكتابة الموقع اللي عايز تعرف عنه البيج رانك

- جميل برضه .. استفادنا ايه بقي علي كده ؟؟

هعيد تاني واقول بكل هدوء .. دلوقتي انت عرفت تحدد بيج رانك اي موقع .. طيب انت لو جيت دخلت علي موقع البيج رانك بتاعه اعلي من 4 مثلا وجيت حطيت اللينك بتاعك في اي حته في الموقع ده .. كده تبقي انت ضمنت ان شاء الله موقعك يبقي موجود علي صفحات جووجل في اقل من 3 ايام بالكتير

- انت مش قلت 24 ساعة يا عم انت ؟؟

قلت طبعا بس انت وشطارتك

- ازاي يعني ؟؟

يعني دلوقتي اللي حط اللينك بتاعه في موقع البيج رانك بتاعه 6 هيظهر قبل اللي حطه في بيج رانك 5 وهكذا وكلما زادت عدد اللينكات في المواقع المختلفة كلما زادت سرعة وضع جووجل لموقعك علي صفحاتها ده غير ان ليها فوائد كتير تانية هتعرفها ادام ان شاء الله

- جميل دلوقتي انا فهمتك بس ازاي بقي هحط لينك الموقع في اي من المواقع دي ؟؟

الموضوع مش الصعب .. تعالا معايا وهوريك خطوة خطوة ازاي تقدر تحط لينك موقعك في موقع ليه بيج رانك 4 مثلا

- واديني معاك اهو

دلوقتي احسن المواقع اللي تقدر تذييل فيها اسم موقعك والرابط بتاع هي مواقع الـ Tutorials الاجنبية ودي بتبقي مواقع فيها شروحات عن كل حاجة وكل البرامج والجرافيكس .. الخ
طب تعالا بقي نفتح جووجل

www.google.com

ونكتب مثلا php tutorials

هتظهرلك نتائج البحث .. انا اخترت الموقع ده علي سبيل المثال وليس الحصر
http://www.goodphptutorials.com

ودي صورته

ولو شفت البيج رانك بتاعه من جووجل تولبار هتلاقيه 4

طيب دلوقتي تعالا بمنتهي السهولة وخش علي اي درس تلاقيه

افتح الدرس اتفرج عليه وانزل تحت خالص هتلاقي Add Your Comment مجرد هتكتب اسمك وهنا متكتبش اسمك فعلا .. اكتب اسم موقعك ... مثال : 3arablink
اما بالنسبة للرابط فطبعا هتكتب رابط الموقع بتاعك .. وفي ال comment بتاعك تكتب اي كلمتين حلوين وتحط معاهم برضه لينك موقعك زي كده مثلا

this is wonderful tutorial .. i read it 3 times and get a fantastic results and sure i put a
copy of this lesson on my site here

www.3arablink.com

- بس انا لا قريت الموضوع ولا اعرف بيتكلم عن ايه ؟؟

مانت بقي خليك واد صايع كده عشان يبقي الكلام جميل ... و خليك ذكي متكتبش رابط موقعك بس من غير اي كلام لانهم ممكن يمسحوا الرابط اللي انت حطيته ويعتبروا مشاركتك دي سبام
ودي صورة توضح كل حاجة ومكان المشاركة وتكتب ايه بالظبط تاني

تمام كده يا معلم

- اه تمام

وللعلم ده برضه موقع للـ tutorials وده الموقع اللي انا اضفت فيه موقعي واللي ظهر في 3 ايام علي الرغم من انه بيج رانك 2 فقط
http://netcades.com

ومش هديلك الموقع وبس .. تعالا اوريك برضه بشكل مبسط اضافة موقعك فيه

يارب تكونوا فهمتوا قصدي

ومتسناش برضه دلائل المواقع المنتشرة .. ليها اهمية كبيرة جدا جدا .. حاول تحط موقعك في اكبر قدر من الدلائل


ملاحظة : اذهب الي الدرس الاخير لتحميل روابط لدلائل موقع تضف بهم موقعك

وللعلم ان المواقع الاجنبية دايما ليها الاسبقية في اي شيء .. يعني لو موقعك اجنبي هيظهر اسرع بالتأكيد

دلوقتي متقفش عند كده .. لأ خش علي اكبر قدر من المواقع والدلائل البيج رانك بتاعها اعلي من 4 او حتي اعلي من 3 او انشاء الله 2 واعمل نفس الحركة اللي عملناها بأنك برضه تعمل بحث زي ماعلمنا وتاخد اي موقع غير اللي عملناه .. ومتعملش كل اللينكات بتاعتك في موقع واحد ابدا .. ممكن الموقع ده يكون بيمنع وضع وصلات لمواقع اخري في اي تعليق وبيعتبره سبام .. خليهم في مواقع كتيرة .. فاضافة موقعك في المواقع دي اولا هيخلي الموقع زي ما قلنا ينزل في جووجل بسرعة مش هتعدي ابدا ال 3 ايام باذن الله .. ثانيا ده بيعلي البيج رانك بتاعك انت اصلا والبيج رانك ده حاجة مهمة جدا في تقييم المواقع وزي ما قولتلك هتعرف كل حاجة عنها بالتفصيل في الدروس الجاية ان شاء الله

الحمد لله كده نبقي انتهينا من الدرس الاول حبايبي .. ياريت اي حد عنده اي استفسار بجد ما يتردتش ويحط سؤاله هنا وان شاء الله هرد عليه في اقل وقت

تهيئة موقعك بمحركات البحث وجلب الاف الزوار

بسم الله الرحمن الرحيم

السلام عليكم ورحمة الله وبركاته

اليوم بمشيئة الله تعالي هقدملكم موضوع من اضخم الموضوعات عن تهيئة موقعك عبر محركات البحث باذن الله تعالي وجلب الاف الزوار

قبل البداية احب اقول ان نتيجة الشغل اللي هطبقة في الموضوع ده مش هتظهر قبل شهر علي الاقل .. يعني تقدر تحكم علي النتيجة بعد شهر من دلوقتي لو كنت مطبق كل حاجة صح فمتتخيلش ابدا ان الزوار هينزلوا عليك زي الرز من يوم وليله .. وتقدر تتابع تريبك في اليكسا و عدد الصفحات اللي ارشفتها جووجل وتقدر تحدد انت بتتقدم ولا زي مانت

ومعلش هتلاقوني برغي كتير لاني شارح بالتفصيل الممل لان الشرح ده موجه للمبتدئين اكتر .. ده غير اني بادئ من الصفر يعني للي هما لسه عاملين موقع جديد طازة واي كلام يسبقة علامة "-" ده بتبقي الاسئلة اللي انا بتوقعها واللي ممكن تيجي في بالكم اثناء الشرح ..

وده فهرس الموضوع باذن الله ..

1 ) اسرار تسجيل موقعك في جووجل ومحركات البحث الاخري في اقل من 24 ساعة

2 ) عمل السايت ماب لموقعك

3 ) انشاء ملف الروبتس (robots.txt).. وماهي عناكب البحث ؟؟

4 ) نبذه عن عن نظام عمل اليكسا وكيف يحسب ترتيب المواقع

5 ) كيفية عمل تولبار بأسم موقعك في اليكسا وتقديمه الي زوارك

6 )نبذه عن فكرة البيج رانك لجووجل و نظام عملها كيفية رفع هذا البيج رانك

7 ) اهمية عنوان الموقع و وصف الموقع والكلمات المفتاحية

8 ) بعض العمليات المهمة لاصحاب المنتديات

9 ) نصائح عامة مهمة جدا طبقها

10 ) اكثر من 3 الاف دليل موقع لاضافة موقعك بهم مع مثال لاضافة موقعك بواحد منهم

منقول

مدونة seoyours بسم الله الرحمن الرحيم

بسم الله الرحمن الرحيم

ان شاء الله تجدو هنا كل ما هو مفيد بالنسبة لمجال السيو

عالم الSEO عالم كبير ملىء باركان كثيرة لكى ترتقى بموقعك وتصل به لاكبر عدد من الزوار

ولكى تصل الى هذا يجب ضبط كل شىء فى موقعك خاص بهذا المجال

وباذن الله نقدر هنا نشرح ونجمع أكبر قدر من المعلمومات المرتبطة بهذا المجال

اخوكم فى الله محمد